‘തഗ്ഗദേ ലേ’; പുഷ്പ റിലീസിന് മുന്നേ അല്ലുവും രശ്മികയും കൊച്ചിയില്‍, ചിത്രങ്ങള്‍ കാണാം

അല്ലു ആരാധകരുടെ കാത്തിരിപ്പിനൊടുവില്‍ പുഷ്പ വെള്ളിയാഴ്ച്ച തിയേറ്ററുകളിലെത്തുകയാണ്. ചിത്രത്തിന്റെ പ്രചരണാര്‍ത്ഥം അല്ലുവും രശ്മികയും കൊച്ചിയിലെത്തി. പുഷ്പയുടെ സംഗീത സംവിധായകന്‍ ദേവി ശ്രീ പ്രസാദും സംഘത്തിലുണ്ടായിരുന്നു. ഏറെ ആരാധകരുള്ള കേരളത്തില്‍ ചിത്രം പ്രദര്‍ശനത്തിനെത്തുന്നതില്‍ സന്തോഷമുണ്ടെന്ന് അല്ലു പറഞ്ഞു. ഇന്ത്യയിലെ എല്ലാവര്‍ക്കും കണ്ടാസ്വദിക്കാവുന്ന ചിത്രങ്ങളൊരുക്കുകയാണ് തന്റെ ലക്ഷ്യമെന്നും അല്ലു മാധ്യമങ്ങളോട് പ്രതികരിച്ചു. മോഹന്‍ലാലിനേക്കുറിച്ച് അല്ലു പറഞ്ഞ വാക്കുകള്‍ ആരാധകര്‍ ഏറ്റെടുത്തിട്ടുണ്ട്.

മോഹന്‍ലാല്‍ സാറിന ഇഷ്ടമില്ലാത്ത ഒരു ദക്ഷിണേന്ത്യന്‍ നടന്‍ പോലും ഉണ്ടാകില്ല. നമ്മള്‍ ഇവരെ കണ്ടാണ് വളര്‍ന്നുവന്നത്. അവരെ ഇഷ്ടപ്പെടാതിരിക്കാന്‍ കാരണമില്ല.

അല്ലു അര്‍ജുന്‍

നിര്‍മ്മാതാക്കളുടെ സംഘടനയായ കെഎഫ്പിഎ അദ്ധ്യക്ഷന്‍ എം രഞ്ജിത്ത്, ഡ്രിസ്ടിബ്യൂട്ടേഴ്‌സ് അസോസിയേഷന്‍ പ്രസിഡന്റ് സിയാദ് കോക്കര്‍ എന്നിവരും പത്ര സമ്മേളനത്തില്‍ പങ്കെടുത്തു.

പ്രഖ്യാപന സമയം മുതല്‍ വാര്‍ത്തകളില്‍ ഇടംപിടിച്ച പുഷ്പ, റിലീസിന് മുമ്പേ തന്നെ 250 കോടി ക്ലബ്ബില്‍ ഇടംനേടിയിരുന്നു. ചിത്രവുമായി ബന്ധപ്പെട്ടുള്ള ഓരോ അപ്‌ഡേറ്റിനും വലിയ സ്വീകാര്യതയാണ് ലഭിച്ചത്. ചിത്രം രണ്ടുഭാഗമായിട്ടാണ് എത്തുക. പുഷ്പ ദ റൈസ് എന്നാണ് ആദ്യഭാഗത്തിന്റെ പേര്. ദേവി ശ്രീ പ്രസാദിന്റേതാണ് സംഗീതവും സൗണ്ട് ട്രാക്കും. ഫഹദ് ഫാസില്‍ വില്ലന്‍ വേഷത്തിലെത്തുന്നു എന്ന പ്രത്യേകതയും പുഷ്പയ്ക്കുണ്ട്. മൈത്രി മൂവി മേക്കേഴ്സിന്റെയും മുട്ടംസെട്ടി മീഡിയയുടെയും ബാനറില്‍ നവീന്‍ യെര്‍നേനിയും വൈ രവിശങ്കറും ചേര്‍ന്നാണ് ചിത്രം നിര്‍മ്മിക്കുന്നത്. മിറോസ്ലോ കുബ ബറോസ്‌കിന്റേതാണ് ക്യാമറ. സൗണ്ട് എഞ്ചിനീയറായി റസൂല്‍ പൂക്കുട്ടി എത്തുന്നു. കാര്‍ത്തിക് ശ്രീനിവാസാണ് ചിത്രസംയോജനം നിര്‍വഹിച്ചിരിക്കുന്നത്. 250 കോടി രൂപ ചെലവിട്ടാണ് ചിത്രം ഒരുക്കിയത്.

UPDATES
STORIES