ആക്രമിക്കപ്പെട്ട നടിയുടെ പ്രതികരണത്തിന് പിന്തുണയുമായി സിനിമയിലെ സഹപ്രവര്‍ത്തകര്‍. കഴിഞ്ഞ അഞ്ചുവര്‍ഷമായി തുടരുന്ന പോരാട്ടത്തെക്കുറിച്ച് നടി പങ്കുവെച്ച കുറിപ്പ് നിമിഷങ്ങള്‍ക്കകം താരങ്ങള്‍ ഏറ്റെടുത്തു. സംവിധായകന്‍ ബേസില്‍ ജോസഫ്, അഭിനേതാക്കളായ പാര്‍വതി തിരുവോത്ത്, പൃഥ്വിരാജ്, ടൊവിനോ തോമസ് തുടങ്ങി നിരവധി താരങ്ങളാണ് സോഷ്യല്‍ മീഡിയാ പ്ലാറ്റ്‌ഫോമുകളിലൂടെ പിന്തുണ അറിയിച്ച് രംഗത്തെത്തിയിരിരിക്കുന്നത്.
ഗീതു മോഹന്‍ദാസ്, കുഞ്ചാക്കോ ബോബന്‍, റിമാ കല്ലിങ്കല്‍, ആഷിഖ് അബു, പൂര്‍ണിമ ഇന്ദ്രജിത്ത്, ഷറഫുദ്ദീന്‍, സംയുക്ത മേനോന്‍, ഇന്ദ്രജിത്ത്, നിമിഷാ സജയന്‍, രമ്യാ നമ്പീശന്‍, മധു നാരായണന്‍, അന്ന ബെന്‍, ബാബുരാജ്, സയനോര, ഐശ്വര്യ ലക്ഷ്മി, മനു അശോകന്‍, അഷ്‌റഫ് ഹംസ, മിയ തുടങ്ങിയവരും പിന്തുണ അറിയിച്ചിട്ടുണ്ട്.
അഞ്ച് വര്‍ഷമായി തന്റെ പേരും വ്യക്തിത്വവും തനിക്ക് സംഭവിച്ച അതിക്രമത്തിനടിയില്‍ അടിച്ചമര്‍ത്തപ്പെട്ടിരിക്കുകയാണെന്നായിരുന്നു അക്രമിക്കപ്പെട്ട നടിയുടെ കുറിപ്പ്. കുറ്റം ചെയ്തത് താന്‍ അല്ലെങ്കിലും എന്നെ അവഹേളിക്കാനും നിശബ്ദയാക്കാനും ഒറ്റപ്പെടുത്താനും ഒരുപാട് ശ്രമങ്ങള്‍ ഉണ്ടായിട്ടുണ്ട്. ഇരയാക്കപ്പെടലില്‍നിന്നും അതിജീവനത്തിലേക്കുള്ള ഈ യാത്ര ഒരിക്കലും എളുപ്പമായിരുന്നില്ലെന്നും നടി ഇന്‍സ്റ്റഗ്രാമില്‍ കുറിച്ചു.
‘ഈ യാത്ര ഒരിക്കലും എളുപ്പമായിരുന്നില്ല. ഇരയാക്കപ്പെടലില്‍നിന്നും അതിജീവനത്തിലേക്കുള്ള ഈ യാത്ര. അഞ്ച് വര്‍ഷമായി എന്റെ പേരും വ്യക്തിത്വവും എനിക്ക് സംഭവിച്ച അതിക്രമത്തിനടിയില്‍ അടിച്ചമര്‍ത്തപ്പെട്ടിരിക്കുകയാണ്. കുറ്റം ചെയ്തത് ഞാന്‍ അല്ലെങ്കിലും എന്നെ അവഹേളിക്കാനും നിശബ്ദയാക്കാനും ഒറ്റപ്പെടുത്താനും ഒരുപാട് ശ്രമങ്ങള്‍ ഉണ്ടായിട്ടുണ്ട്. എന്നാല്‍, അപ്പോഴൊക്കെയും ചിലരൊക്കെ നിശബ്ദത ഭേദിച്ച് മുന്നോട്ടുവന്നു; എനിക്കുവേണ്ടി സംസാരിക്കാന്‍, എന്റെ ശബ്ദം നിലയ്ക്കാതിരിക്കാന്‍. ഇന്ന് എനിക്കുവേണ്ടി നിലകൊള്ളുന്ന ഇത്രയും ശബ്ദങ്ങള്‍ കേള്‍ക്കുമ്പോള്‍ ഞാന്‍ തനിച്ചല്ലെന്ന് തിരിച്ചറിയുന്നു’, നടി കുറിച്ചു.
‘നീതി പുലരാനും തെറ്റ് ചെയ്തവര്‍ ശിക്ഷിക്കപ്പെടാനും ഇങ്ങനെയൊരു അനുഭവം മറ്റാര്‍ക്കും ഉണ്ടാകാതിരിക്കാനും ഞാന്‍ ഈ യാത്ര തുടര്‍ന്നുകൊണ്ടേയിരിക്കും. കൂടെ നില്‍ക്കുന്ന എല്ലാവരുടേയും സ്‌നേഹത്തിന് ഹൃദയം നിറഞ്ഞ നന്ദി’, അവര്‍ കൂട്ടിച്ചേര്‍ത്തു.
